19-майдан 23-майга чейинки коомдук мектепте өтүлгөн сабактарга макала

19-майдан 23-майга чейинки коомдук мектепте өтүлгөн сабактарга макала

     «Кыргызстандын жаш лидерлери» коомдук мектебинин кезектеги сабактары уланууда. Билим алып жаткан балдар-кыздарга ар күн сайын кызыктуу тренинг, лекциялардан тышкары, белгилүү компанияларга саякат, ишкер адамдар менен жолугууга да мүмкүнчүлүк болуп жатат. «Прогрессивдүү Демилгелер Фонду» коомдук фондусу түзүп берген мындай мүмкүнчүлүктөрдү студенттер баалап, активдүү катышып жатышат.

Бул жумада Жогорку окуу жайларынын чоң залдарында биригип, чогуу лекцияларга катышышты. Көбүнчө окуучулардын күткөн темалары ушул жумага келип калганбы, айтор бул аптадагы ар бир күн студенттерге кызыктуу болду. Айта кетсек, жаш лидерлерди келечекте мамлекеттик деңгээлдеги чоң жолугууларга даярдык катары ишкерлердин этикети жөнүндө сабак болуп, аны Орозалиева Акима Султановна өттү. Эженин ар бир айткан сөзү, кеңеши маанилүү экенин билип, ар бир студент көңүл коюп угуп, ал тургай артта отургандар туруп алып дагы угуп жатышты.

       Бул жөнүндө Каныбек кызы Гульпери аттуу студенттин: «Бизге эң керектүү тема болду. Биринчи эле, сүйлөшүүгө барганда кийимибизден баары билинет. Туура кийингенден баштап, стол даярдоонун этикасына чейин айтып, үйрөттү. Лектор бизди кийин этикага туура келбеген нерселерди жасап, же туура эмес кийинип албагыла дегендей, бир топ саясатчы же белгилүү адамдардын да кээ бир катачылыктарын мисал катары айтып жатты. Мен этикет боюнча көп нерселерди билип алдым. Лекторго ыраазычылык билдирем» - деген оюн далил катары айтсак болот.

Келечек мамлекет элиталары үчүн ошондой эле «Кыргызстандын акча-кредит тарыхы» деген темада, мурда Улуттук банкта иштеп кеткен Абдыбалы тегин Сүйөркул агай лекция окуп, аягында суроолорго жооп берди.

   Ушул эле аптада Кыргыз Республикасынын коргоо Кеңешинин катчысынын орун басары Жумакадыров Темир Курмангазиевич келип, коомдук мектептин студенттерине эки жумада бир берилчү сертификатты өз колу менен тапшыруудан баштады. «Мамлекеттик коопсуздук. Коррупция менен күрөшүүнүн ыкмалары» деген темада өз оюн түшүндүрүп, коррупция менен эле эмес, анын келип чыгыш себептерин алдын алып, алар менен да күрөшүүнү айтты. Лекциянын аягында студенттердин кызыккан суроолоруна жооп берип, каалоо-тилектери менен кошо кеңештерин да айтып кетти.

     Башында айтылып кеткендей, бул жумада кызыктуу лекциялар эле эмес, кызыктуу баарлашуулар да болду. Анткени, ушул жумада кыргыздын белгилүү ишкери Табылды Эгембердиев агай келип, студенттер менен өз тажрыйбасынан бөлүшүп, залдагы бардык студенттин маанайын көтөрдү. Залдан ар кандай суроолор берилди, анткени мындай үлгүлүү ишкердин жашоосу, ийгилиги ар бир жаш лидерге кызык болчу.

       Ушундай билимге кызыккан демилгелүү студенттердин бул аптадагы сабактар, жолугушуулар кандай өтүлгөндүгү боюнча, кандай жаңы нерселерди алгандыгын билүү үчүн катышуучулардын бири Мелис уулу Тилектин оюн сурап көрдүк: «Жуманын эң биринчи күнү өтүлгөн «Ишкердин этикети» боюнча айтсам, этикага байланыштуу айткандарынын баары мен үчүн кызыктуу болду, көп нерсени билип алдым. Көбүнчөсү Кыргызстанда колдонулбайт экен деген ойго келдим. Ал эми, Табылды Эгембердиев агайдын айткандары, тажрыйбалары бизге эң керектүү деп ойлойм. Анткени, ар кандай темада, ошонун ичинде үй-бүлө, ийгилик, ишкерлик темалары болду», - дейт.

   Ал эми кийинки студенттин кесиби юрист болгондуктан: «Сиздин жеке көз карашыңызга ылайык, Кыргызстанда коррупция боюнча күрөшүү канчалык деңгээлде ишке ашып жатат?» деген суроо менен кайрылдык: «Паракорчулукту, менимче, жоюу мүмкүн эмес. Анткени ал тээ качанкы жылдардан бери бар. өлкөдө коррупция университеттерде көп. Бирок, паракорчулук менен күрөшүү боюнча Кыргызстанда кичинекей кадамдар жасалып жатат», -  деген жообун берди коомдук мектептин студенти Анварбеков Болотбек.

      Жыйынтыктап жатып, коомдук мектептин студенттери өлкөбүздөгү ар кайсы Жогорку окуу жайларынан келишсе да, бири-бирине канча жылдан бери тааныштардай жакын болуп, ошону менен бирге чогуу демилгелерин көтөрүп, иштеп жаткандарынан улам, эртең бул мектептин биринчи бүтүрүүчүлөрүнөн өлкөгө 100 лидер даяр болду деген сөздү кошо кеткибиз келди. 

Болотбек кызы Жылдыз,

«Кыргызстандын жаш лидерлери»  коомдук мектебинин окуучусу,

КНУнун студенти.  

Фото галерея