Коомдук мектептин 3-агымы аяктоо алдында турат

Биз «Кыргызстан жаш лидерлери» коомдук мектебинин 3-агымынын студенттери ар дайым бул мектеп жөнүндө сыймыктануу менен айтып жүрөбүз, анткени ошол сыймыкка татыктуу денгээлде бизди лидер кылып даярдады.

        Мезгилдин агымы менен мемиреген деңизде жүрүп отуруп, сапарыбыз карып, портко кантип жеткенибизди да байкабай калыпбыз. Бекеринен убакыт учкан куш деп айтылбаса керек. «Кыргызстандын жаш лидерлери» коомдук мектебинин 3-агымынын окуу курсу аяктоо алдында турат.

        2015-жылдын 13-майда Акматалиев Алмаз агайдын сабагында, «Демократия жанан Парламентаризм» деген  теманын айланасында өтө кызыктуу талкуу  болду. 14-май күнү «Эмгек партиясынын» Айым Ордо кеңешинин төрайымы, КР маданиятына эмгек синирген ишмери, саясий илимдеринин кандидаты Бүбүкан Акматжановна Досалиева менен жолугушуу болуп, өзүбүзгө бир топ тажрыйба алдык. Бул жолугушуу абдан кызыктуу болду. Алгач өзү жөнүндө тааныштырып, ийгиликтери тууралуу айтып берди. Анан да өлкөдө болуп жаткан айрым окуяларга тынчсызданып, келечек муунга уят болбосок экен деген сыяктуу эң мыкты таасирдүү сөздөрдү айтты. «Саясий этика» деген китеп жазып жатканынан кабардар да болдук. Биз үчүн журналистика дүйнөсү аябай эле кызык болуп, эженин ар бир сөзүнөн өзүбүзгө эргүү алып, патриоттук сезимибиз күчөп жатты.

Ал эми 15-май жума күнү, ордолуу Ош шаарынан келген бизнесмен агабыз Аскар Маматжанов,  биз менен өз ийгилик сырлары менен бөлүштү. Талыкпаган эмгектин, изденүүнүн, татыктуу билимдин арты менен ушул деңгээлге жеткендигин айтып отурду. Агай Москвадан билим алып, ошол билими азыркы ийгилиги, отургузган чырпыгынын мөмөсү экенин баса белгиледи. Студенттер тарабынан бир топ суроо берилип, алдыда мындан да бийик пландары тууралуу ойлорун айтты. Ордолуу Ош  шаарынан чыккан жарма, курут сыяктуу суусундуктар азыркы учурда Ош шаарында бренд экенин да билдик. Мына ушундай улуу инсандардан сабак алып, өзүбүздүн, Ата-Журтубуздун эртеңки келечеги үчүн билим алып жатканыбызга 3 айдын жүзү болуптур. Биз ушул аралыкта канчалык денгээлде билим алдык, канчалык деңгээле бекер билим алуубузга шарт түзүп берген уюштуруучуларыбыздын эмгегин актадык, муну эми өзүбүз иш жүзүндө далилдейбиз!

      Биз «Кыргызстан жаш лидерлери» коомдук мектебинин 3-агымынын студенттери ар дайым бул мектеп жөнүндө сыймыктануу менен айтып жүрөбүз, анткени ошол сыймыкка татыктуу денгээлде бизди лидер кылып даярдады. Кебимдин соңунда Алыкул Осмоновдун тѳмѳнкү ыр сабы менен жыйынтыктоону эп көрүп турам.

Бар бололу түгөнбөйлү курдаштар,

Узак, узак болсун бул сапар.

Кылым бүтүп дүйнөдөн жок болсок да,

Кайра кайтып жолугушчу жолдор бар.

 

Абдиманас кызы Айзада,

Коомдук мектептин студенти.

 

 

Фото галерея