Прогрессивдүү Демилгелер Фондунун 2014-жылдагы билим долбоорлору жыйынтыкталды

«Кыргызстандын жаш лидерлери» коомдук мектебинин экинчи бүтүрүүчүлѳрүнүн атайын презентация, видеолору, мамлекетибизди ѳнүктүрүүгѳ салым кошуу боюнча ант берүүсү менен, ошондой эле «Кыргызстандын жаш лидерлери» коомдук мектебинин биринчи бүтүрүүчүлѳрүнүн аймактардагы жана Бишкек шаарындагы ѳткѳргѳн тренингтери боюнча отчеттору менен коштолду.

2014-жылдын 19-декабрында Эл аралык Инновациялык Технологиялардын Университетин чон залында Прогрессивдуу Демилгелер Фондунун билим долбоорлору болгон «Кыргызстандын жаш лидерлери» коомдук мектебинин экинчи жүз бүтуүрүүчүсүнѳ жана Агартуу Лигасына катышкан Бишкек шаарынадагы жогорку окуу жайлардын студенттерине сертификаттарды тапшыруу аземи болуп ѳттү. Белгилеп ѳтүүчү нерсе бир жыл аралыгында Фонд тарабынан 2500 дѳн ашык жаштарга маркетинг, бизнес-пландоо, финансылык сабаттуулук, фандрайзинг, лидерлик сапат, кызматтык этикет, тайм-менеджмент, ѳзүн-ѳзү ѳнүктүрүү ж.б. ушул сыяктуу заманбап багыттарда үч айлык, бир айлык, бир жумалык жана бир күндүк атайын курстар жана тренингтер жогоруда аталган долбоорлор аркылуу Кыргызстандын бардык аймактарында ишке ашты. Билим долбоорлорунун жыйынтыгын чыгаруу расмий иш чарасы жогорку денгелде ѳтүп, «Кыргызстандын жаш лидерлери» коомдук мектебинин экинчи бүтүрүүчүлѳрүнүн атайын презентация, видеолору, мамлекетибизди ѳнүктүрүүгѳ салым кошуу боюнча ант берүүсү менен, ошондой эле «Кыргызстандын жаш лидерлери» коомдук мектебинин биринчи бүтүрүүчүлѳрүнүн аймактардагы жана Бишкек шаарындагы ѳткѳргѳн тренингтери боюнча отчеттору менен коштолду. Аталган иш чара Фонддун негиздѳѳчүсү Салымбеков Аскар Мааткабыловичтин катышуусу менен ѳтүп, ѳз колу менен коомдук мектептин бүтүрүүчүлѳрүнѳ, Агартуу Лигасынын катышуучуларына сертификаттарды тапшырды. Жаштар үчүн маанилүү мындай иш чарага, ошондой эле Эл аралык Инновациялык Технологиялардын Университетинин ректору Бегалиев Улугбек Турдалиевич, Чыгыш Университетинин ректору Ибраев Алмаз Орозакунович, Инновациялык технология жана экономика колледжинин директору Жунушалиева Нурзат Манасовна катышышып, жаштарга ийгилик каалап, аларга сертификаттарды тапшырышты. Заманбап билимге ээ болуп, сертификаттарын алып жаткан жаштар, мындай мүмкүнчүлүктү түзүп, жаштарга реалдуу колдоо кѳргѳзүп жаткан Фонддун негиздѳѳчүсү Аскар Салымбековго терен ыраазычылыктарын билдиришип, алган билимдерин башка жаштарга жеткирүүгѳ убада беришти. Аталган билим долбоорунун ийгиликтүү ишке ашып, жаштар тарабынан чоң колдоо жана ыраазычылыктар менен коштолгонун эске алып, Аскар Салымбеков мындай долбоорлорду ѳлкѳбүздүн ар бир район, шаарларында ишке ашырууга аракеттер боло турганын айтып ѳттү. Иш чаранын сонунда Фонддун директору Амангелди Жумадилов чыгып сүйлѳп, долбоорду ишке ашырууга кѳмѳк кѳргѳзгѳн ЖОЖдорго жана жаш ыктыярчыларга ыраазчылыгын билдирип, Агартуу Лигасынын эстафетасы коомдук мектептин экинчи бүтүрүүчүлѳрүнѳ ѳткѳндүгүн белгиледи.

Бир сѳз менен айтканда, аталган иш чара чоң позитив жана динамика менен ѳтүп, элибизде чыгаан жаштар бар экенин далилдеди. Жаш лидерлер арышыңар кең болуп, багытыңар түз болсун!

Фото галерея